ޚިދުމަތްތެރި ނަމޫނާ މުދައްރިސެއް

ހއ. އިހަވަންދޫ އާހިޔާ އަލްފާޟިލް އަހުމަދު ރަޝީދު ނުވަތަ އާންމު ނަމުންނަމަ ދޮންބެއަކީ ހއ.ހޯރަފުށީ އަލަނާސިގޭ މުޙައްމަދު ޔޫސުފާއި ހއ. އިހަވަންދޫ ނެދުންގޭ ޖަމީލާ އާދަމަށް ލިބިފައިވާ ހަތް ބޭފުޅުންގެ ތެރެއިން ހަތަރުވަނަ ބޭފުޅާއެވެ. މިޒާޖުގައި މަޖާގޮތެއްހުންނަ އަލްފާޟިލް އަހުމަދު ރަޝީދު ދުނިޔޭގެ އަލިކަންދެކެވަޑައިގެންފައިވަނީ 5 ފެބުރުއަރީ 1974 ގައި ހއ. އިހަވަންދޫ ވެދުންގެއަށެވެ. 2001 ވަނަ އަހަރު އެބޭފުޅާ ޒަވާޖީ ހަޔާތެއް ފަށްޓަވާފައިވާއިރު އެކައިވެޏަށްވަނީ ދަރިކަލަކާއި ދަރިކަނބަލެއް ލިބިވަޑައިގެންފައެވެ.

އަލްފާޟިލް އަހުމަދު ރަޝީދު އެންމެ ފުރަތަމަ ތަޢުލީމު ހާޞިލްކުރެއްވީ އިހަވަންދޫ މަދަރުސާއިންނެވެ. އެމަދަރުސާއިން ގްރޭޑު6 ނިންމަވައިލެއްވުމަށްފަހު ތަޢުލީމީހަޔާތް ބަދަލުކޮށްލައްވާފައިވަނީ ވެރިރަށް މާލޭގެ ސުކޫލެއްކަމުގައިވާ މަދަރުސަތުލް އަހުމަދިއްޔާއަށެވެ. އެސުކޫލުންވަނީ ރަނގަޅުކާމިޔާބީތަކަކާއެކު ޖީސީއޯލެވެލް އަދި މަތީސާނަވީ މަރުހަލާ ނިންމަވާލައްވާފައެވެ. އެއަށްފަހު އެބޭފުޅާވަނީ ބެޗްލަރ އޮފް އިސްލާމް ޓީޗިން އޯނަރސް އާއި ޑިޕްލޮމާއިން ސުކޫލް މެނޭޖްމަންޓްވެސް ހައްދަވާފައެވެ. މީގެއިތުރުންވެސް ސުކޫލު ދުވަސްވަރު އެބޭފުޅާ ފާހަގަކުރެވިފައިވަނީ އިތުރު ހަރަކާތްތަކުގައި ހާއްސަކޮށް ޤުރުއާން މުބާރާތްތަކުގައި ބައިވެރިވެލައްވާ ހަރަކާތްތެރި ދަރިވަރެއްގެ ގޮތުގައެވެ. އަދިހަމަ އެހެންމެއެބޭފުޅާ ފާހަގަކުރެވިފައިވަނީ ވަރަށް ހިތްވަރުގަދަ، ވަރުގަދަ އަޒުމަކާއެކު ކިޔެވުމަށް މަސައްކަތްކުރެއްވި ބޭފުޅެއްގެ ގޮތުގައެވެ. އެގޮތުން އާމްދަނީ ހޯދުމަށްޓަކައި ވަޒީފާ އަދާކުރައްވަމުން، އަނބިދަރިންނާއި ދުރުގައި އެތަކެއް ދުވަސްތަކެއްވަނީ ހޭދަކުރައްވާފައެވެ.

ތަޢުލީމީ ދާއިރާއަށް ހާއްސަ ލޯތްބެއް ހުންނަ ބޭފުޅެއްގެ ގޮތުގައި އަލްފާޟިލް އަޙްމަދު ރަޝީދު ފާހަގަކުރެވިފައިވާއިރު އެދާއިރާއަށް އެބޭފުޅާ ދަނީ މެދުކެނޑުމެއްނެތި ޚިދުމަތްކުރައްވަމުންނެވެ. އެންމެފުރަތަމަ ތަޢުލީމީ ދާއިރާއާއި ގުޅިވަޑައިގެންނެވީ އިހަވަންދޫ މަދަރުސާގެ ވަގުތީ މުދައްރިސެއްގެ މަޤާމަށް ވެންނެވި ހިސާބުން 1998 ވަނައަހަރުގައެވެ. އެއަށްފަހު މިއަދާއި ހަމައަށް ތަޢުލީމީ ދާއިރާއަށް ޚާއްސަކޮށް އިހަވަންދޫ މަދަރުސާއަށް އެބޭފުޅާގެ އަގުނުކުރެވޭނެ ޚިދުމަތްތައް އަންނަނީ ލިބެމުންނެވެ. އެގޮތުން 1999 ގައި އެބޭފުޅާވަނީ އިހަވަންދޫ މަދަރުސާގެ އެސިސްޓެންޓް ޓީޗަރެއްގެ މަޤާމުވެސް ފުރުއްވާފައެވެ. އޭގެފަހުން 2001 ވަނަ އަހަރުވަނީ އިސްލާމް މުދައްރިސްކަން ކުރައްވަންފަށްޓަވާފައެވެ. ހަމައެއާއެކު އެދުވަސްވަރުވަނީ އިސްލާމް/ދިވެހި "އެޗް . އޯ . ޑީ" ކަންވެސް ކުރައްވާފައެވެ. 2006ވަނަ އަހަރު ސްޕަވައިޒަރ ކަމާއި 2008 ވަނަ އަހަރު ގުރެޖްއޭޓް ލީޑިން ޓީޗަރ ކަމުގެ މަޤާމުވެސްވަނީ ފުރުއްވާފައެވެ. އޭގެފަހުން ކިޔަވައިވިދާޅުވާން މާލެވަޑައިގެން ތާޖުއްދީނު ސުކޫލުގެ ގުރެޖްއޭޓް ޓީޗަރެއްގެ މަޤާމާއި "ސެންޓަރ ފޯރ ކޮންޓިނުއިން އެޑިއުކޭޝަން" ގެ އިސްލާމް މުދައްރިސެއްގެ ވަޒީފާވަނީ އަދާކުރައްވާފައެވެ. އެއީ 2009 ވަނަ އަހަރުގައެވެ. މިހާރު އަލްފާޟިލް އަޙްމަދު ރަޝީދު ހުންނެވީ އިހަވަންދޫ މަދަރުސާގެ ކޮލިފައިޑް ލީޑިން ޓީޗަރެއްގެ މަޤާމުގައެވެ.

ތަޢުލީމީ ދާއިރާގެ އިތުރުން އެބޭފުޅާވަނީ ރަށުގެ ޢިޖުތިމާޢީ ހަރަކާތްތަކުގައިވެސް ބައިވެރިވެލައްވާފައެވެ. އެގޮތުން އިހަވަންދޫގެ ނަންހިނގާ މަޝްހޫރު ކުލަބުޖަމިއްޔާއެއްކަމުގައިވާ އިމަގު ޖަމިއްޔާގެ ސެކެރެޓަރީކަމާއި އެޖަމިއްޔާގެ 3 ވަނަ ރައީސްކަންވަނީ ކުރައްވާފައެވެ. އަދި މިހާރުވެސް ދަނީ މިނިސްޓްރީ އޮފް އިސްލާމިކު އެފެއާޒުގެ ހުކުރުކުރާ އިމާމެއްގެ މަޤާމު ފުރުއްވަމުންނެވެ.

އަލްފާޟިލް އަޙްމަދު ރަޝީދުގެ ފާހަގަކޮށްލެވޭ ޚިދުމަތްތަކުގެ ތެރޭގައި ދަރިވަރުންގެ އަޚްލާޤް ރަނގަޅުކުރުމަށްޓަކައި ކިޔަވާދެއްވާ ވަގުތު އޮބްޒަރވް ކުރުމާއި ކައުންސިލިން ދިނުމާއި ފުރަތަމަ ސުކޫލަށް ގުރޭޑް 8 ގެނައުމަށްޓަކައި ހިސާބާއި ސޯޝަލް ކިޔަވައިދިނުން އަދި ގުރޭޑް 11 އުފެއްދުމަށްޓަކައި ކުރެއްވި ބުރަމަސައްކަތްތަކެވެ. ވުމާއެކު އަލްފާޟިލް އަޙްމަދު ރަޝީދުގެ މިމަސައްކަތްތައް ރަށުގެ އެންމެން ޚާއްސަކޮށް އަޅުގަނޑުމެން ދަރިވަރުން  ބަލައިގަންނަނީ އެކަމަށް ޝުކުރުވެރިވާ ހާލުގައެވެ. ނަތީޖާއެއްގެގޮތުން އެބޭފުޅާވަނީ ދަރިވަރުންގެ މެދުގައި މަޤުބޫލު ޝަޚްޞިއްޔަތަކަށް ވެވަޑައިގެންފައެވެ.