ތަޢާރަފް
2004 ވަނައަހަރު
ރާއްޖެއަށް ކުރިމަތިވި ސުނާމީ ކާރިޘާގައި ރާއްޖޭގެ އެތަކެއް ރަށެއްގެ ފަޅުވަނީ
ވަރަށްބޮޑަށް ހަލާކުވެ، ބޭނުންކޮށް އުޅުމަށް ދަތިވެފައެވެ. އެގޮތުން ހއ.
އިހަފަރަކީވެސް މިމައްސަލަ ކުރިމަތިވެފައިވާ ރަށެކެވެ. ސަޢުދީ ސަރުކާރުގެ ހިލޭ
އެހީގެ ދަށުން މިރަށުގެ ފަޅުހަދަމުންދާއިރު ދާދިފަހުން މިރަށުގެ
ރައްޔިތުންތަކެއް ވަނީ މިކަންކުރަމުންދަނީ އެމީހުން ބޭނުންވާ ގޮތަށްނޫންކަމަށް
ބުނެ އެމަސައްކަތް ހުއްޓުވާފައެވެ. މިއީ މިނިސްޓްރީ އޮފް ހައުސިންގ ގެ ފަރާތުން
މިމައްސަލަ ތަހްޤީޤުކުރުމަށްފަހު ލިޔާ ރިޕޯޓެކެވެ. މިރިޕޯޓުގައި
އަލިއަޅުވާލާފައިވާނީ ފަޅުހެދުމަށް ކުރިންކުރެވިފައިހުރި މަސައްކަތްތައް
ދިޔަގޮތާއި މިފަހަރުގެ މަޝްރޫއުކުރިޔަށް ގެންދަންހަމަޖެހިފައިއޮތްގޮތާއި މިކަމުގައި
ހިމެނޭފަރާތްތަކުގެ ބަހާއި ކުރިމަގުގައި މިފަދަމައްސަލަތައް
މެދުވެރިނުވާނެގޮތަކަށް ކަންކަން ކުރިއަށް ގެންދާނެގޮތުގެ މައްޗަށެވެ.
ފަޅުހެދުމަށް
ކުރިންކުރެވިފައިހުރި މަސައްކަތްތައް ގޮސްފައިވާގޮތް
އާބާދީގައި 3500
މީހުން ދިރިއުޅެމުންދާ އިހަފަރުގެ ފަޅު އެންމެ ފުރަތަމަ ފުންކޮށްފައިވަނީ 1990
ވަނައަހަރު ރައްޔިތުންގެ ސީދާ ބެލުމުގެ ދަށުން ރައްޔިތުންގެ މާލިއްޔަތުން
ހޭދަކޮށްގެންކަމަށް ރަށުގެ ކައުންސިލް އިދާރާގައި ރައްކާކުރެވިފައިވާ
ލިޔެކިޔުންތަކުން ދައްކައެވެ. ނަމަވެސް މޫސުމީ ބަދަލުތަކާއި އުދައެރުމާއި ވިދިގެން
ރަށުގެ ފަޅަށް ލިބުނު ބޮޑެތި ގެއްލުންތަކުގެ ސަބަބުން ފަޅުފުންކުރުމުގެ މަސައްކަތް
ސަރުކާރުން 2000 ވަނައަހަރުގެ ތެރޭގައި އެމް.ޖީ.ސީ.ޓީ އާއި ހަވާލުކޮށް ކުރިއަށް
ގެންގޮސްފައިވެއެވެ. މިހުރިހާ ފަހަރެއްގައިވެސް މަސައްކަތްތައް ނިމިފައިވަނީ
ހަމަނުޖެހުމެއް ނުހިނގައެވެ.
މިފަހަރުގެ މަޝްރޫޢު
ކުރިއަށް ގެންދަން ހަމަޖެހިފައިވާގޮތް
2004 ވަނައަހަރު
ހަލާކުވެފައިވާ މިރަށުގެ ފަޅު މަރާމާތުކުރުމަށް ސަރުކާރުން ހަވާލުކޮށްފައިވަނީ
އުވަދޯނި ކޮންސްޓްރަކްޝަނާއެވެ. އެގޮތުން މިކުންފުންޏާއި އެކު ސަރުކާރުން
ހަދާފައިވާ އެގްރީމެންޓަށް ބަލާއިރު ފަޅު އިތުރަށް ފުންކުރުމަށާއި ފަޅުބޮޑުކޮށް
ފަޅާއި ގުޅުންހުރި ވެލިގަނޑު ހިމާޔަތްކުރުމަށްޓަކައި ފަޅުގެ ދެފަރާތުން
ރިވެޓްމެންޓް ޖެހުމަށް ނިންމާފައިވެއެވެ. އަދި މިމަސައްކަތް ޢަމަލީގޮތެއްގައި
ފެއްޓިފައިވަނީ 2010 ވަނައަހަރުގެ ޑިސެމްބަރ 26 ވަނަ ދުވަހުއެވެ.
މިކަމުގައި ހިމެނޭ
ފަރާތްތަކުގެ ބަސް
ހއ. އިހަފަރުގައި
ހިންގަމުންއަންނަ އޮންލައިން ނޫހެއްކަމުގައިވާ އިހަފަރު ޑޮޓް ކޮމް ގައި
ޝާއިއުކޮށްފައިވާ ޚަބަރެއްގައިވާ ގޮތުން މިދާއިރާގެ އިއްޒަތްތެރި މެންބަރު
އަލްފާޟިލް މުހައްމަދު ޤާސިމް ނަޝީދު ވަނީ 2009 ޖެނުއަރީ 22 ވަނަ ދުވަހު މިރަށުގެ
ރައްޔިތުންނާއި ބައްދަލުކޮށް ރައްޔިތުންގެ މެދުގައި އުފެދިފައިވާ
ހިޔާލުތަފާތުވުންތައް އަޑުއައްސަވައި ރައްޔިތުންގެ އެދުންތަކަކީ ކޮބައިތޯ
ބައްލަވާފައެވެ. މިބައްދަލުވުން 2:40 ގައި ނިންމަވާލެއްވިއިރު ބައްދަލުވުމަށް
ހާޒިރުވެފައިވަނީ އެމަނިކުފާނު ނިސްބަތްވާ ކަޅުކުލަ ޕާޓީގެ 50 މެންބަރުން
އެކަނިކަން ފާހަގަކޮށްލެވެއެވެ.
ރަށުގެ ޖަމިއްޔާ
ޖަމާޢަތްތަކާއި ކޮމެޓީގެ ބަސްތަކުން އެނގުނުގޮތުގައި މިމަސައްކަތް
ހަވާލުކޮށްފައިވާ އުވަދޯނި ކޮންސްޓްރަކްޝަނުން އެބޭފުޅުންނާއި އެއްވެސް ކަހަލަ
މަޝްވަރާއެއްކޮށްފައެއް ނުވެއެވެ. ނަމަވެސް މިރަށުގެ ކައުންސިލްގެ ރައީސް
އިބްރާހިމް ޔާމިނު ރަށުގައި ނެރެވޭ ބައްތިރީސް ނޫހަށް ދީފައިވާ ބަސްދީގަތުމުގައި
ވިދާޅުވެފައިވަނީ ރައްޔިތުންގެ ހިޔާލު ހޯދުމަށް ކައުންސިލުން އެތަކެއްފަހަރު
މަތިން މަސައްކަތްކޮށްފައިވީ ނަމަވެސް ބައްދަލުވުންތަކަށް އެކަށީގެންވާ އަދަދެއްގެ
ބަޔަކު ހާޒިރުވެފައި ނުވާކަމަށާއި ރަށުގެ ޖަމިއްޔާތަކަށް ދަޢުވަތުދީގެން ބާއްވާ
ބައްދަލުވުންތަކުގައި ފަތިފުށް ޖަމިއްޔާ ފިޔަވައި އެއްވެސް ޖަމިއްޔާއަކުން
ހިޔާލުފާޅުކޮށްފައި ނުވާކަމަށެވެ. އަދި އުވަދޯނި ކޮންސްޓްރަކްޝަނުގެ ބޭފުޅުން
ކައުންސިލާއި މަޝްވަރާ ކުރައްވާކަމަށާއި އެހެންނަމަވެސް ޖަމިއްޔާތަކާއި މަޝްވަރާ
ކޮށްފައިވާކަން އެނގިފައިނުވާކަމަށް އަދި ރައްޔިތުން މިކަމާއި ގުޅޭގޮތުން
ކައުންސިލުގެ ހިޔާލެއް ހޯއްދަވަން ވަޑައިނުގަންނަވާކަމަށާއި މިއީ މުޅިން އެހެން
މަޤްޞަދެއްގައި ކުރާކަމެއްކަމަށް އެމަނިކުފާނުވަނީ ތުހުމަތުކުރައްވާފައެވެ.
ނިންމުން
މިމައްސަލާގައި
ޝާމިލުވާ ފަރާތްތަކުގެ ބަސްތަކުން އެނގުނުގޮތުގައި މިކަމުގައި ކުރިމަތިވެގެން
މިއުޅެނީ ރައްޔިތުންނާއި އެކަށީގެންވާ މަޝްވަރާނުކުރުމުގެ ސަބަބުން އުފެދުނު
ހިޔާލުތަފާތުވުންތަކަކުންނެވެ. ވުމާއެކު ކުރިއަށް އޮތްތަނުގައި މިފަދަ
ކަންތައްތައް މެދުވެރިނުވެ ކަންތައްތައް ކުރުމަށްޓަކައި ހިޔާލާއި މަޝްވަރާ ހޯދުން
މުހިއްމެވެ. އަދި ކަންކަން ކާމިޔާބުކޮށް ކުރިއަށް ގެންދިއުމަށްޓަކައި އެންމެ
އެއްބާރުލައިގެން މަސައްކަތްކުރުން މުހިއްމެވެ. ހަމައެއާއެކު އެއްފަރާތުން އަނެއް
ފަރާތެއް ކުށްވެރިކުރުމުގެ ބަދަލުގައި އެކުވެރިކަމާއި ސުލްހަވެރިކަމާއިއެކު
މައްސަލަ ހައްލުކުރުމަށް މަސައްކަތްކުރެވިދާނެއެވެ.
ޚިޔާލު :
ޚިޔާލު ފާޅުކުރެއްވުމަށް
ހިޔާލު