މަތީ ސާނަވީގައި ދިވެހި ތާރީޚް ވަކި މާއްދާއެއްގެ ގޮތުގައި ކިޔަވައިދޭނަމަ ކުރާނެ ފައިދާ

ދިވެހިރާއްޖޭގައި މީހުން ދިރިއުޅެމުން އަންނަތާ އެތަކެއް އަހަރުތަކެއް ވެފައިވާއިރު، ހަމަޔަޤީނުންވެސް ދިވެހި ތާރީޚް ވެގެންދާނީ ވަރަށްވެސް މުއްސަނދި ތާރީޚަކަށެވެ. ނަމަވެސް މިޤައުމު އަޅުގަނޑުމެންނާ ހަމައަށް އަމާނާތްތެރިކަމާއިއެކު ގެނެސްދިނުމަށްޓަކައި ކާބަފައިން އޮހޮރުވި ލެޔާއި ކުރި ބުރަ މަސައްކަތްތައް މިއަދުގެ ދަރިންނަށް ކިޔައި ނުދޭނަމަ، ކިތައްމެ މުއްސަނދި ތާރީޚެއް އޮތްނަމަވެސް ކުރާނެ އެއްވެސް ފައިދާއެއް އެބައޮތްތޯއެވެ؟ އެއާއި ޚިލާފަށް މަތީ ސާނަވީ މަރުހަލާގައި ސުކޫލުތަކުގައި ކިޔަވާ ދަރިވަރުންނަށް ދިވެހި ތާރީޚް ވަކި މާއްދާއެއްގެ ގޮތުގައި ކިޔަވައިދެވިއްޖެނަމަ ކާބަފައިންގެ ތެރެއިން ކާމިޔާބު ބަޠަލުންގެ ދިރިއުޅުއްވުމުން ނަމޫނާލިބުމާއި ދިވެހިބަސް އާލަވުމަށް މަގުފަހިވުމާއި ދިވެހި ޘަޤާފަތް ކުރިއެރުމަށް ބާރުލިބުމާއި ކުރީގެ ހާދިސާތަކުން ޢިބްރަތް ލިބިގަނެ އޭރު ހެދިފައި ހުންނަ ގޯސްތައް ދެވަނަ ފަހަރަށް ތަކުރާރުވިޔަ ނުދިނުމަށް އެހީލިބުން ފަދަ އެތައް ފައިދާތަކެއް ލިބިގެންދާނެއެވެ.

މި ދިވެހި ފަސްގަނޑަކީ އެތަކެއް ކާމިޔާބު ޝަހްޝިއްޔަތުތަކެއް އުފަންވެ ނެތި ގޮސްފައިވާ ތަނެއްކަން ތާރީޚްގެ ޞަފުހާތަކަށް ބަލައިލުމުން އެނގިގެންދާނެއެވެ. ވުމާއެކު ރައްކާކުރެވިފައިވާ ބައޮގްރަފީތަކުގެ އެހީގައި އެބޭފުޅުންގެ ކާމިޔާބު ހަޔާތާއި ބެހޭ ސިއްރުތައް ބަލައި ހޯދައިފިނަމަ، އެބޭފުޅުން ހަޔާތް ބާއްޖަވެރިކުރުމަށްޓަކައި ގެންގުޅުއްވި ރީތި އާދަތަކާއި ސިފަފުޅުތައް ދަސްވެ އެކަންތައްތައް ގައިގާ އަށަގެންނުވުމަށް މަސައްކަތްކުރެވި ދިރިއުޅުން ބާއްޖަވެރިކުރެވޭނެއެވެ.

ދިރިއުޅުން ބާއްޖަވެރިވުމަށް އެހީލިބުމުގެ އިތުރުން ދިވެހި ބަސްކުރިއެރުވުމުގައިވެސް ތާރީޚް އުނގަންނައިދިނުމަކީ މުހިއްމުކަމެކެވެ. ދިވެހިބަސް ނެތެމުންދާކަމުގެ ބިރު ހީވާންފަށައިފާވާއިރު އިހުގެ ކާބަފައިން ބޭނުންކުރަމުންއައި ވަޒަންބަހުރުވައިގެ ބާވަތްތައް ހަދަން އެނގޭ މީހުން މިހާރު އިނގިލިން ގުނާލެވޭހާވެސް މަދެވެ. ވުމާއެކު މި ބާވަތްތައް ހަދަން އެނގުމަކީ ކޮންމެހެން ބޭނުންތެރިކަމަކަށްވަނީ ވެފައެވެ. އެގޮތުން ދިވެހިބަހުގެ ތާރީޚް ދިރާސާކުރުމުން އިހުދިވެހިން ރައިވަރުފަދަ ތަކެތި ހަދަމުން އައި ގޮތް ދަސްވެ އުވި ނެތެމުންދާ ދިވެހިބަސް ކޮޅަށްޖެހުމަށް އިތުރު ބާރަކަށް ވެގެންދާނެއެވެ.

ދިވެހިބަހެކޭ އެއްފަދައިން ދިވެހި ޘަޤާފަތާއި އާދަކާދަތައް ދިރުވައި އާލާކުރުމަށްޓަކައިވެސް ތާރީޚް ކިޔަވައިދިނުމުގެ ބޭނުންތެރިކަން ވަރަށް ބޮޑެވެ. އެގޮތުން ކާބަފައިން ފާހަގަކުރަމުން އައި އެކިއެކި ދުވަސްތަކާއި އެދުވަސްތަކުގައި ކަންކުރާގޮތަގޮތާއި ކުޅޭ ކުޅިވަރުތަކާއި ލާހެދުމާއި މިތަކެތި ކިޔަވައިދީފިނަމަ އަދުގެ ދަރިން ޤައުމުގެ ޘަޤާފަތަށާއި އާދަކާދަތަކަށް އަހުލުވެރިވެގެންދާނެކަން ޔަޤީނެވެ.

މީގެ އިތުރުންވެސް ޤައުމުދެކެ ލޯބިވާ ޖީލެއް ބިނާކުރެވުމަކީވެސް ތާރީޚް ކިޔަވއިދިނުމުގެ އެއްފައިދާއެކެވެ. ކާބަފައިން މިޤައުމު އަޅުގަނޑުމެންނާއި ހަމައަށް މިނިވަންކަންމަތީ ގެނެސްދިފައިވަނީ ހަމަގައިމުވެސް ވަރަށް ގިނަ ޤުރުބާނީތަކެއްވެގެންނެވެ. އެތަކެއް ދުޝްމިނުންތަކަކާއި ފިސާރި ސާބިތުކަމާއެކު ކުރިމަތިލައިގެންނެވެ. އެފަދަ ޖިހާދުތައް ޤައުމަށްޓަކައި ކުރެއްވި ޤައުމު ފަޚްރުވެރިވާ ބަޠަލުންގެ އަގުހުރި ހަޔާތްޕުޅުންތައް، ތާރީޚްގެ ފަތްފުށްތަކުގައި ފޮހެވިގެންނުދާނެ ގޮތުގައި ލިޔެވިފައިވެއެވެ. އެހެންކަމާއެކު ތާރީޚް ބަލައިފިނަމަ އެބޭފުޅުންގެ ހިތްތަކުގައި ޤައުމީލޯބި އޮތް މިންވަރު ވަޒަންކުރެވި ޤައުމީލޯބި ހިތުގައި އާލާވާނެއެވެ.

ކާބަފައިންގެ ދިރިއުޅުމުން މައުލޫމާތު ލިބިގެންދިއުމަކީ ތާރީޚް އުނގަންނައިދިނުމުން ކުރާނެ ފައިދާއެކެވެ. އެގޮތުން އެޒަމާނުގައިވެސް ހެދިފައި ހުންނަ ގޯސްތަކުން ނުކުމެފައި ހުންނަ ނުރަނގަޅު ނަތީޖާތައް ދެނެގަނެވެއެވެ. އަދި އެކަންކަން ދިރިއުޅުމުގައި ތަކުރާރުވިޔަ ނުދިނުމަށް އެހީއަކަށްވާނެއެވެ. ހަމައެހެންމެ އެއިރުގެ މައުލޫމާތުތަކުގެ އަލީގައި ތަފާތު އުފެއްދުންތެރި ޚިޔާލުތައް ލިބި ޤައުމު ކުރިއެރުވުމުގައި ބޭނުންކުރެވިގެންދާނެއެވެ.

ދިވެހި ތާރީޚް ވަކި މާއްދާއެއްގެ ގޮތުގައި ކިޔަވައިދިނުމަކީ އެކަމުން ހީވެސްނުކުރެވޭހާ ގިނަ ފައިދާލިބޭކަމެކެވެ. އެގޮތުން ނަމޫނާ ލިބި ދިރިއުޅުން ކާމިޔާބުވުމާއި ދިވެހިބަސްކުރިއެރުމާއި ދިވެހި ސަޤާފަތްކުރިއެރުމާއި ޤައުމީ ލޯބި އިތުރުވުމުގެ އިތުރުން ޤައުމު ކުރިއެރުވުމަށްޓަކައި އުފެއްދުންތެރި ޚިޔާލު ލިބުންފަދަ ބައިވަރު ފައިދާތަކެވެ. ނަމަވެސް ހިތާމައަކީ ދިވެހި ތާރީޚަކީ މުއްސަނދި އަދި ކިޔަވައިދެވޭނެ މައުލޫމާތު ހުރި ތާރީޚަކަށްވީނަމަވެސް ތާރީޚް ދިރާސާކޮށް އުނގެނުމުގެ ފުރުޞަތު އެއްވެސް ވަރަކަށް ލިބިފައިނުވާކަމެވެ. ވުމާއެކު އަޅުގަނޑު އުންމީދުކުރަނީ ކޮންމެވެސް ދުވަހަކުން ދިވެހި ތާރީޚާ ބެހޭގޮތުން ސުކޫލުތަކުގައި ކިޔަވައިދީ ދިވެހި ތާރީޚް އުނގެނުމުގެ ފުރުޞަތު ލިބިގެންދިއުމެވެ.