މަދަރުސާތަކުގައި ދިވެހިބަހުގެ ދުވަހެއް ފާހަގަކުރަންޖެހެއެވެ

ދުނިޔޭގެ ވަރަށްގިނަ ޤައުމުތަކުގައި އެޤައުމެއްގެ މާދަރީބަހަށް ޚާއްޞަކޮށްގެން ވަކި ދުވަހެއް ފާހަގަކުރެވެމުންދެއެވެ. އަދި ބައެއް ޤައުމުތަކުގައި އެދުވަހަކީ ރަސްމީ ބަންދު ދުވަހެއްކަމުގައި ވެސް ކަނޑައަޅައިފައި އޮވެ އެވެ. ވީއިރު ދިގު ތާރީޚަކާއި އަމިއްލައަކުރެއް ލިބިފައިވާ އަޅުގަނޑުމެންގެ މިދިވެހިބަހުގެ ދުވަހެއް ފާހަގަކުރަންޖެހޭ ކަމާމެދު އެއްވެސް ޝައްކެއްނެތެވެ. ހާއްސަކޮށް މަދަރުސާތަކުގައި މިދުވަސް ފާހަގަކުރުމަކީ ވަރަށް މުހިއްމުކަމެކެވެ. އޭގެ ސަބަބުތައް ބައިވަރެވެ. އެގޮތުން ދިވެހިބަސް އަންނަން އޮތް ޖީލުތަކަށް ރައްކާތެރިކަމާއެކު ފޯރުކޮށްދިނުމަށާއި ދަރިވަރުންގެ ހިތްތަކުގައި ދިވެހިބަހަށް ޝައުޤުވެރިކަން އުފެއްދުމާއެކު އަމިއްލަބަހާއި މެދު ފަޚްރުވެރިވާ ބައެއްކަމުގައި އެކުދިން ހެދުމުގެ އިތުރުން ބަހާއި ބެހޭ މަޢުލޫމާތު ރަނގަޅަށް ދެނެތިބެ އެބަސް މުއްސަނދި ކުރާނެ ދަރިން ތަކެއް އުފެދުމަށްޓަކައިވެސް ދިވެހިބަހުގެ ދުވަހެއް މަދަރުސާތަކުގައި ފާހަގަކުރަންޖެހެއެވެ.

ކޮންމެ ބަޔެއްގެވެސް ޚިޔާލުތަކާއި ޝުޢޫރުތައް އުފެދި ސިކުނޑީގައި ރައްކާކުރެވެނީ އެބަޔެއްގެ މާދަރި ބަހުންނެވެ. ވުމާއެކު އެއްވެސް ބަޔެއްގެ މާދަރީބަސް ނެތިގެން ހިނގައްޖެނަމަ، އެގެއްލިގެންދަނީ އަގުހުރި ތަރިކައެކެވެ. މުޖުތަމަޢުގެ ސަޤާފަތާއި އާދަކާދައެވެ. އަދި އެފޮހެވިގެންދަނީ އެބަޔެއްގެ ތާރީޙެވެ. އެބައެއްގެ ވިސްނުންތަކާއި ފިކުރުތަކުގެ އަސަރެވެ. ވުމާއެކު އަޅުގަނޑުމެންގެ ޤައުމިއްޔަތު ރައްކާތެރިކުރުމަށްޓަކައި އެޤައުމިއްޔަތުގެ މައިގަނޑު އެއްބަހާ ކަމުގައިވާ ދިވެހިބަސް ދިރުވައިއާލާކުރަންޖެހެވެ. އެގޮތުން ދިވެހިބަހުގެ ދުވަހެއް މަދަރުސާތަކުގައި ފާހަގަކުރުމަކީ އަޅުގަނޑުމެންގެ މިދިވެހިވަންތަކަމުގެ ރަމްޒު ކަމުގައިވި ދިވެހިބަސް ރައްކާތެރި ކުރުމަށްޓަކައި ކޮންމެހެންވެސް ކުރަންޖެހޭކަމެކެވެ.

ދިވެހިބަސް ރައްކާތެރިކުރުމުގެ އިތުރުން ދަރިވަރުންގެ ހިތްތަކުގައި ދިވެހިބަހާއި މެދު ޝައުޤުވެރިކަން އުފެއްދުމަކީވެސް ދިވެހިބަހުގެ ދުވަހެއް ފާހަގަކުރުމުގެ އެއްބޭނުމެވެ. އަޅުގަނޑުމެންގެ ދިވެހިބަހަށްކުރިމަތިވެފައިވާ އެންމެ ބޮޑު އެއްގޮންޖެހުމަކީ އެބަހުން ވާހަކަދައްކައި އުޅޭ މީހުންގެ އަދަދު މަދުކަމެވެ. އެގޮތުން އަދުގެ ދަރިވަރުން، މުސްތަޤުބަލުގައި ދިވެހިބަހުން ވާހަކަ ދައްކަންތިބި މީހުންގެ ޝައުޤުވެރިކަން އެބަހަށް ނުލިބިއްޖެނަމަ ބަސްއުވިގެންދިއުމަކީވެސް އެކަށީގެންވާކަމެކެވެ. ވުމާއެކު ދަރިވަރުންގެ ހިތްތަކުގައި ދިވެހިބަހަށް ޝައުގުވެރިކަން އިތުރުކުރަންވަނީ ކޮންމެހެންވެސް ޖެހިފައެވެ. މިކަހަލަ ދިވެހިބަހުގެ ދުވަހެއް މަދަރުސާތަކުގައި ފާހަގަކުރެވިއްޖެނަމަ ހަމަޔަޤީނުންވެސް ދަރިވަރުންގެ ހިތްތަކުގައި ބަހަށް އޮތް ލޯބި އިތުރުވެގެން ދިއުމުގެ އިތުރުން އެކުދިންނަކީ އަމިއްލަ ބަހާމެދު ފަޚްރުވެރިވާބަޔަކަށް ވެގެންދާނެއެވެ.

ދިވެހިބަހުގެ ދުވަހެއް ފާހަގަކުރަންޖެހޭ އަނެއް ސަބަބަކީ ދިވެހިބަހާއި ބެހޭ މަޢުލޫމާތު ކިޔަވާކުދިންނަށް ފޯރުކޮށްދިނުމެވެ. އެއާއެކު ދިވެހިބަސް އުފެދިގެންއައި ގޮތާއި ދިވެހި ބަހަށް އެކި ދުވަސްވަރު އައިސްފައިވާ ބޮޑެތި ބަދަލުތައް އަދި އެކި ދުވަސްވަރުތަކުގައި ބަހަށް ޚިދުމަތްކުރެއްވި ތަފާތު އަދީބުންނާއި ބެހޭ މަޢުލޫމާތުފަދަ އެތަކެއް މަޢުލޫމާތެއް ކުދިންނަށް އެނގިގެންދާނެއެވެ. އޭގެ ސަބަބުން ކުރީގެ އަދީބުންގެ މަސައްކަތްތަކުން ނަމޫނާ ލިބިގަނެ ދިވެހިބަސް އިތުރަށް ކުރިއެރުވުމަށްޓަކައި ކުދިންނަށް އިތުރު ބާރަކަށް އެކަންވެގެންދާނެއެވެ.

ބަހާއި ބެހޭ ތަފާތު އެކިއެކި މަޢުލޫމާތުތައް ދަރިވަރުންނަށް ފޯރުކޮށްދިނުމާއެކު ދިވެހިބަހުގެ އަދަބިއްޔާތު އިތުރަށް މުއްސަނދިކޮށް، ވަޅު ޖެހެމުންދާ އަދަބީ ފަންނުތައް ދިރުވާ އާލާކުރުމަށްޓަކައިވެސް މަދަރުސާތަކުގައި ދިވެހިބަހުގެ ދުވަހެއް ފާހަގަކުރުމަކީ މުހިއްމުކަމެކެވެ. އެގޮތުން ކުރީ ޒަމާނުގައި ކާބަފައިން ހަދަމުން އައި ވަޒަންބަހުރުވައިގެ ބާވަތްތައް ހަދަން އެނގޭ މީހުން ދަނީ މަދުވަމުންނެވެ. ޚާއްސަކޮށް މަދަރުސާތަކުގެ ދަރިވަރުންގެ ތެރެއިން ވަޒަންބަހުރުވައިގެ ބާވަތްތައް ހަދަން އެނގޭ ކުދިން އިނގިލިން ގުނާލެވޭހާ މަދެވެ. މިފަދަ ދުވަހެއް ބައްޓަންވެފައި ހުންނާނީ ދަރިވަރުންނަށް މިފަދަ ފަންނުތައް ތަރައްޤީކުރުމަށްޓަކައި ތަފާތު ހަރަކާތްތައް ހިނގިގެންދާނެ ގޮތަކަށެވެ. ވުމާއެކު ދަރިވަރުންގެ ލިޔުންތެރިކަން އިތުރުވެ، ދިވެހިބަސް އިތުރަށް މުއްސަނދިވެ ވަރުގަވެގެންދާނެއެވެ.

ދިވެހިބަހަކީ އަޅުގަނޑުމެން ދިވެހީންގެ މާދަރީ ބަހެވެ. އަޅުގަނޑުމެން އެންމެން ދިވެހިންނަށް ހަދައިދޭ  ދިވެހި ޤައުމިއްޔަތުގެ އެއްބަހާއެވެ. ދިވެހިބަސް އުވި ނެތިގެން ހިނގައްޖެނަމަ އެލިބުނީ އަނބުރާ އިޢާދާ ނުކުރެވޭނޭފަދަ ގެއްލުމެކެވެ. ފޮހެވިގެން އެދިޔައީ ދިވެހި ތާރީހުގެ އަސްލެވެ. ދިވެހިންގެ ވިސްނުމާއި ފިކުރުތަކުގެ އަސަރެވެ. ވުމާއެކު ދިވެހިބަސް ރައްކާތެރިކޮށް ދަމަހައްޓަންޖެހެއެވެ. އެކަންކުރެވޭނީ މުސްތަޤްބަލުގެ ޖީލުކަމަށްވާ އަދުގެ ކިޔަވާކުދިން ދިވެހިބަހަށް ޝައުޤުވެރިކުރެވިގެންނެވެ. އެކުދިންނަކީ ބަހަށް ހޭލުންތެރި، ބަސްދެކެ ލޯބިވާ، އަމިއްލަ ބަހާމެދު ފަޚްރުވެރިވާ ކުދިންތަކެއް ކަމުގައިވެގެންނެވެ. އަދި ކިޔަވާކުދިންނަށް ދިވެހިބަހާއި ބެހޭ މަޢުލޫމާތު ދިނުމުގެ އިތުރުން ތަފާތު އަދަބީ ފަންނުތައް ދަސްކޮށްދީގެންނެވެ. މިކަންކަން ކުރިއަށްގެންދެވޭނީ މަދަރުސާތަކުގައި ދިވެހިބަހުގެ ދުވަހެއް ފާހަގަކުރެވިގެންނެވެ.