1984
ވަނައަހަރު ރާއްޖޭގައި ފުރަތަމަ ފަހަރަށް ތަޢުލީމީ މަންހަޖެއް އެކުލަވާލައި
ތަންފީޒުކުރަންފެށުމާއެކު ތަޢުލީމީ ދާއިރާއަށް ބޮޑެތި ކުރިއެރުންތަކެއް
ލިބިގެންދިޔައެވެ. ސުކޫލުތަކުގެ މެދުގައި ވާދަވެރިކަން އުފެދި އިމްތިހާނުތަކުން
މަތީ ނަތީޖާ ހޯދަންފެށިއެވެ. އެހެންނަމަވެސް ދުވަސްވަމުން އައިވަރަކަށް
މަންހަޖުގައިވާ މައްސަލަތައް ދިޔައީ ފާހަގަކުރެވެމުންނެވެ. އެ ހުރިހާ ކަމަކަށް
ބެލިގެން ހަދާފައިވާ މަންހަޖެއްގެ ބޭނުން ބޮޑުވަމުން ދިޔުމުގެ ސަބަބުން، އޭގެ
ތިރީސް އަހަރު ފަހުން 2015 ވަނަ އަހަރު އައު މަންހަޖެއް ތަންފީޒުކުރަން މި ވަނީ
ފެށިފައެވެ. މި އައު މަންހަޖު އެކުލަވާލުމަށްޓަކައި އެކި ޤައުމުތަކުގައި
ޢަމަލުކުރާ މަންހަޖުތައް ދިރާސާކޮށްފައިވެއެވެ. ހަމައެއާއެކު މަންހަޖު
ފަރުމާކުރުމުގައި ރާއްޖެއާއި ދުނިޔެއަށް އަންނަމުންދާ އިޖްތިމާޢީ، އިޤްތިޞާދީ،
ސިޔާސީ ބަދަލުތަކާއި އުނގަންނައިދިނުމުގެ ވައްޓަފާޅިއަށް އަންނަމުންދާ
ބަދަލުތަކަށް ރިޢާޔަތްކޮށްފައިވެއެވެ. ވުމާއެކު އުއްމީދުކުރެވެނީ އައު މަންހަޖަށް
ޢަމަލުކުރަން ފެށުމާއެކު އިސްލާމްދީނާ އެއްގޮތަށް ޢަމަލުކުރާ، ބިނާކުރަނިވި އަދި
އުފެއްދުންތެރި ގޮތެއްގައި ވިސްނުން ގެންގުޅޭ، އެހެން މީހުންނާ ގުޅިގެން އުޅޭފަދަ އަދި
އަދުގެ ޓެކްނޮލޮޖީއާއި މީޑިޔާގެ ވަޞީލަތްތަކަށް އަހުލުވެރި ކުދިންތަކެއް
އުފެދިގެންދާނެކަމަށެވެ.
ކުރީގެ މަންހަޖުގައި
ބޮޑު އިސްކަމެއްދެވިފައިވަނީ ކުދިން އިމްތިހާނަށް ތައްޔާރުކުރުމަށެވެ. އޭގެ
ސަބަބުން ކުދިންގެ ގައިގާ އަޚްލާޤީ ރިވެތި ހަރުދަނާ ސިފަތައް އަށަގެންނެވުމަށް
އެކަށީގެންވާ މަސައްކަތްތަކެއް ވަނީ ނުކުރެވިއެވެ. ކުދިންނަށް އިސްލާމީ އުސޫލުތައް
ބުނެނުދެވުމުގެ ނަތީޖާއަކަށްވީ އެކުދިންގެ އީމާންކަން ބަލިކަށިވުމެވެ. ބޮޑެތި
ކުށްތަކަށް އަރައިގަތުމަށް ފަސްނުޖެހުމެވެ. ރާއްޖޭގެ މިހާރުގެ ހާލަތުން މިކަން
ވަރަށް ރަނގަޅަށް ހާމަވެގެންދެއެވެ. ވުމާއެކު އައު މަންހަޖު ބައްޓަންކޮށްފައިވަނީ
އިސްލާމީ އަޤީދާ ވަރުގަދަ އިސްލާމްދީނާ އެއްގޮތަށް ޢަމަލުކުރާ ކުދިބައެއް
އުފެއްދުމަށެވެ. އެހެންކަމުން އައުމަންހަޖާއެކު ކުދިންގެ އަޚްލާޤަށާއި އުޅުމަށް
ހެޔޮ ބަދަލުތަކެއް އަންނާނެކަމަށް އުއްމީދުކުރެވެއެވެ.
އިސްލާމްދީނާ
އެއްގޮތަށް ޢަމަލުތައް ބަހައްޓާ، އިސްލާމީ އަޤީދާ ވަރުގަދަ ކުދިންތަކެއް
އުފެއްދުމުގެ އިތުރުން ބިނާކުރަނިވި އުފެއްދުންތެރިގޮތެއްގައި ވިސްނުން ގެންގުޅޭ
ކުދިބައެއް އުފެއްދުމަކީވެސް އައު މަންހަޖުގެ އެއް އަމާޒެވެ. ހަމައެކަނި
ކަރުދާހުގައި ޓެސްޓް ހެދުމުގެ ބަދަލުގައި ކުދިންގެ މަސައްކަތްތަކުން
ޓެސްޓްކުރުމަކީ ކުދިންގެ އުފެއްދުންތެރިކަން ކުރިއަރާނެކަމެކެވެ.
"ކޮންޓެންޓު"ގައި އޮންނަ އެއްޗެއް ދަސްކުރުމަށްވުރެ ބޮޑަށް އަމިއްލައަށް
ވިސްނުމުގެ ފުރުޞަތު އައު މަންހަޖުން ލިބިގެންދެއެވެ. އަދި ކުދިންގެ ވިސްނުން
ތަރައްޤީކުރުމަށްޓަކައި "ކްރިއޭޓިވް ތިންކިން" ކިޔާ މާއްދާއެއް އައު
މަންހަޖުގެ ދަށުން އުފެދިގެން ދާނެއެވެ. ވުމާއެކު އުއްމީދުކުރެވެނީ އައު
މަންހަޖުގެ ސަބަބުން އުފެއްދުންތެރިގޮތެއްގައި ވިސްނުން ގެންގުޅުމުގެ
ޤާބިލިއްޔަތުކަން ކުދިންގެ ކިބައިގާ ހަރުލެވިގެންދާނެކަމަށެވެ.
އެހެން މީހުންނާ
ގުޅިގެން އުޅުމުގެ ސިފަ ކުދިންގެ ގައިގާ ހަރުލެއްވުމަކީވެސް އައު މަންހަޖުގައި
ކަނޑައަޅާފައިވާ ލަނޑުދަނޑިއެކެވެ. ކުރީގެ މަންހަޖު ބޮޑަށް ބިނާކުރެވިފައިހުރީ
އަމިއްލައަށް ކިޔެވުމުގެ މައްޗަށެވެ. ގްރޫޕު މަސައްކަތްތައް ފަދަ އެހެން ކުދިންނާ
ޚިޔާލު ބަދަލުކޮށް ގުޅުން ބަދަހިކުރެވޭނެ ގޮތްތައް އެ މަންހަޖުގައި މަދެވެ.
ނަތީޖާއެއްގެ ގޮތުން ސުކޫލު ނިންމާފައި ނިކުންނަ ގިނަ ކުދިންނަށް މުޖުތަމަޢުގެ
މީހުންނާ ގުޅިގެން އުޅޭކަށް ނޭނގެއެވެ. އެހެންކަމުން އައު މަންހަޖުގައި މިކަމަށް
ހައްލެއް ގެނައުމަށް މަސައްކަތްކޮށްފައިވެއެވެ. ކުދިންނާ ޚިޔާލު ބަދަލުކުރެވޭނެ
ފަދަ ގޮތަކަށް ފިލާވަޅުތައް ރާވާލުމަށް ފުރުޞަތު ދީފައިވެއެވެ.
އައު މަންހަޖުގެ
އަނެއް އަމާޒަކީ ޓެކްނޮލޮޖީ އަދި މީޑިޔާއާ ރައްޓެހި ކުދިބައެއް އުފެއްދުމެވެ.
މިހާތަނަށް ބޭނުންކުރެވެމުންއައީ މީގެ ތިރީސް އަހަރު ކުރިން އެކުލަވާލާފައިވާ
މަންހަޖެއްކަމުން އެ މަންހަޖުވެފައިވަނީ އަދުގެ ޓެކްނޮލޮޖީއާ ބީރައްޓެހި
އެއްޗަކަށެވެ. އަދުގެ ޓެކްނޮލޮޖީއަށް ކުދިން އަހުލުވެރިކުރުވުމަށް އެއްވެސްކަމެއް
އެމަންހަޖުގައި ރާވައިފައެއްނުވެއެވެ. ވުމާއެކު ސުކޫލު ނިންމާފައި ނިކުންނަ
އިރުވެސް ޓެކްނޮލޮޖީއާއި މީޑިޔާގެ ވަޞީލަތްތައް ބޭނުންކުރާކަށް ކުދިންނަކަށް
ދަހެއްނުވެއެވެ. އެހެންނަމަވެސް އައު މަންހަޖުގައި ކުދިން އެފަދަ ވަޞީލަތްތަކަށް
އަހުލުވެރިބަޔަކަށް ހެދުމަށް މަސައްކަތްކޮށްފައިވެއެވެ. ޕްރައިމަރީ ގުރޭޑުތަކުން
ފެށިގެން އެ ވަޞީލަތްތަކުގެ ބޭނުން ހިފަން ދަސްކޮށްދިނުމަށްޓަކައި ވަކި މާއްދާއެއް
ހިމަނާފައިވެއެވެ. ވުމާއެކު ކުރިއަށް އޮތްތަނުގައި ރާއްޖޭގެ ސުކޫލުތައް ނިންމައި
ނިކުންނަ ކުދިންނަކީ ޒަމާނީ ޓެކޮނޮލޮޖީއާއި މީޑިޔާއަށް އަހުލުވެރި ކުދިންތަކަކަށް
ވާނެކަމަށް ޤަބޫލުކުރެވެއެވެ.
1984 ވަނަ
އަހަރުންފެށިގެން ޢަމަލުކުރެވެމުން އައި މަންހަޖުގައި ބޮޑަށް އިސްކަންދީފައިވަނީ
އިމްތިހާނުތަކަށް ކުދިން ތައްޔާރުރުމަށެވެ. އެހެންކަމާއިއެކު ދުވަސްވަމުން
އައިވަރަކަށް އެ މަންހަޖުން އައީ ބޮޑެތި މައްސަލަތައް ފާހަގަވަމުންނެވެ.
މިކަންކަން ހައްލުކުރުމަށްޓަކައި ކުރި މަސައްކަތުން އޭގެ ތިރީސް އަހަރުފަހުން
މިއަދު މިވަނީ އައު މަންހަޖެއް ވުޖޫދުވެ ތަންފީޒުކުރަންފެށިފައެވެ. ކުރީގެ
މަންހަޖާ ޚިލާފަށް މި މަންހަޖުގައި އިސްކަންދީފައިވަނީ ކުދިން ދިރިއުޅުމަށް
ތައްޔާރުކުރުމަށެވެ. އިސްލާމީ އަޤީދާ ވަރުގަދަ، ހަރުދަނާ ވިސްނުންތެރި އަދި އެހެން
މީހުންނާ ގުޅިގެން އުޅޭ ކުދިބައެއް އުފެއްދުމަށެވެ. ހަމައެހެންމެ ޓެކްނޮލޮޖީއާއި
މީޑިޔާގެ ވަޞީލަތްތަކަށް ކުދިން އަހުލުވެރިކުރުމަށްވެސް އިސްކަންދެވިފައިވެއެވެ.
ވުމާއެކު 2015 ވަނަ އަހަރު ތަންފީޒުކުރަން މި ފެށި ޤައުމީ އައު މަންހަޖާމެދު
ކުރެވޭ އުއްމީދުތައް ވަރަށް ފޮންޏެވެ.
ޚިޔާލު :
ޚިޔާލު ފާޅުކުރެއްވުމަށް
ހިޔާލު