ފެބުރުއަރީ 1728
ހއ ކެލާގައި
ހުރި އެންމެ ބޮޑު ކާނިގަސްދޮށް ވަނީ ޖަރީކުރެވިފަ އެވެ. ކާނިގަހުގެ ގޮފިތައް އެކި
ދިމަދިމާއަށް ފެތުރިފައިވާ އިރު އޭގެ ތެރެއިން ގޮފިގަނޑެއްގައި އެލުވާފައިވަނީ
ޝާހީ ގޮތަކަށް ފަރުމާކުރެވިފައިވާ ނަލަ އުނދޯލި ކޮޅެކެވެ. ގަސްދޮށުގައި، ލަކުޑީގެ
މޭޒުތަކާއި ގޮނޑިތައް އަތުރާލެވިފައި ވަނީ ވަރަށްވެސް ތަރުތީބުންނެވެ.
މޭޒުމަތީގައި ތަށިތައް އެތުރުމުގައި ޒުވާން ޖިންސުލްލަތިފުން ހަރަކާތްތެރިވެ އުޅެ
އެވެ. ހިކި ފަތްތަކުގެ މަތިން ދާއިރުވެސް އެއްވެސް އަޑެއް ނީވެއެވެ. އެ
ޖިންސުލްލަތިފުންގެ ފައި ބިމުގައި ނުޖެހޭތީ އެވެ.
މަތިން
އުދުހުގެން އައި ބިޔަ ފިރިހެނުންގެ ލަޝްކަރު ތިރިކުރީ ހަމަ ސީދާ ކާނިގަސް
ދޮށަށެވެ. އެއާ އެކު
އެންމެންގެ
ހަރަކާތްތައް ހުއްޓުނެވެ. އެއީ ހަމުގެ ކުލަ ކަޅު ބިޔަ ބައެކެވެ. ހަށިގަނޑު
ނިވާވެފައިވަނީ ބޯކެހެރިތަކުންނެވެ. އަތުގެ އިނގިލިތައް ފަލަވެފައި ނިޔަފަތިތައް
ދިގެވެ. އުނުގައި ދިގު ކަނޑިތައް އެލުވާލެވިފައި ހުއްޓެވެ. ލަޝްކަރަށް މަރުޙަބާކީ
ރީތި މާތައް ހިފައިގެން ހުރި ރީތި ޒުވާން ޖިންސުލްލަތީފުންނެވެ.
ތަނަށް
ވެރިވެފައިވާ ހަމަހިމޭންކަން ކަނޑުވާލީ ލަޝްކަރުގެ ކޮމާންޑަރުގެ ބަރު އަޑުންނެވެ.
އެއީ އެ އެންމެންގެ އިންސާފުވެރި ރަސްގެފާނެވެ. "މިއަދަކީ ވަރަށް ޚާއްޞަ
ދުވަހެއް... އަހަރެންގެ ފުރަތަމަ ދަރިފުޅަށް ހަތް ދުވަސް ފުރޭ ދުވަސް...."
ކޮމާންޑަރުގެ މޫނުމަތިން ފެނިގެން ދަނީ އުފާވެރިކަމެވެ. އުންމީދުގެ
ކުލަވަރުތަކެވެ. " މި ދަރިފުޅުގެ ނަމަކީ ބަޖީލް.." ކޮމާންޑަރު ގޮސް
އުނދޯލީގައިވާ ކުޑަކުއްޖާ ނަގާ އެންމެނަށް ދައްކާލި އެވެ. އެއާ އެކު އެންމެންގެ
މޫނުމަތިވެސް އުޖާލާވެގެން ދިޔައެވެ.
" އެ
ކުއްޖާގެ ފޫޅު ނުކަނޑަނީތަ؟؟" ލަޝްކަރުގެ ފަހުލަވާނަކަށް މަޑުމަޑުން
ބުނެލެވުނެވެ. އެ ކުއްޖާގެ ފޫޅު އާދަޔާ ޚިލާފަށް ދިގެވެ. އެކަން، ލަޝްކަރުގެ އެންމެނަށްވެސް
ފާހަގަކުރެވުނެވެ. ނަމަވެސް ހަރު އަޑުން އެކަން ހާމަކުރަން ކެރޭ ހަމަ އެކަކުވެސް
އެތާކު ނެތެވެ.
އެންމެންނަށް
ސިހުން ގެނުވި އެވެ. މަތިން އައި ބޮޑު ދުނިދަނޑި އަމާޒުވީ އުނދޯލި އެލުވިފައިވާ
ގޮފިގަނޑަށެވެ. ހަމަ އެއާއެކު މުޅި ލަޝްކަރު އެލާޓަށް އަތުވެއްޖެ
އެވެ. މަތިން އުދުހިފައި އައި ބޮޑު ބައިގަނޑާ، ލަޝްކަރާ ދެމެދު ހަމަލާ
ބަދަލުކުރެވެން ފަށައިފި އެވެ. މުޅި މާހައުލު ހަނގުރާމައިގެ މައިދާނަކަށް
ބަދަލުވެގެން ދިޔައީ ހީވެސް ނުކުރާހާ އަވަހެށެވެ. ހަނގުރާމަ އިތުރަށް ގޯސްވުމުގެ
ކުރިން، ދަނޑިވަޅުގެ ބޭނުންކޮށް، ލިބުނު ފުރުސަތުގައި ރަސްގެފާނު ބަޖީލާއި އެކު
އުދުހި ގޮސް ޣައިބުވެއްޖެ އެވެ.
25 ނޮވެމްބާރ
1789
މަސްލަހަތު ވަނީ އިންތިހާ ދަރަޖައަށް ގޯސްވެފަ އެވެ. ނުރައްކާތެރިކަންވެސް ނުހަނު
ބޮޑެވެ. ބޭރަށް ބޯ ދިއްކޮލަން ކެރޭވަރަށްވުރެ ގައުމުގެ ހާލަތު ވަނީ ގޯސްވެފަ އެވެ.
ދެ ފަރާތުގެ ދެމެދުގައި ހަނގުރާމަކުރެވެމުން ދިޔައީ އިންސީންގެ ތެރޭގައި ހަނގުރާމަ
ކުރެވޭ ގޮތަކަށް ނޫނެވެ. ބަދަލު ކުރެވެމުން ދިޔައީ އަލިފާނުގެ ބޯޅަތަކެވެ. ބޮޑެތި
އަލިގުޅަތަކެވެ. ތޫނު ދުނިދަނޑިތަކުގެ ވާރޭ ވެހެމުންދެ އެވެ. ވަރުގަދަ ކަނޑިތަކުން
ބޯތައް ބުރިކުރަމުންދެއެވެ.
ކަތޫމްއާއި
އޭނާގެ އަންހެން ދަރިފުޅު ޖަބުޙާ ތިބީ ބޮޑު ގަހެއްގެ ތެރޭގަ އެވެ. ގަހުގެ ތެރެއަށް
ވަދެވޭނީ އެތެރެއިން ހުއްދަ ދީގެންނެވެ. އެއީ ކަތޫމްއަށް ޔަޤީންވާ ކަމެކެވެ.
ފިރިމީހާގެ ހާލު ދެކިލަން ކިތަންމެ ބޭނުންވި ނަމަވެސް އޭނާއަކަށް ބޭރަކަށް
ނުކުންނާކަށް ކުޅަދާނަވެގެންނެއްނުވެ އެވެ. ބޭރުގައި ކުރެވެމުންދާ ހަނގުރާމައިގެ
ވަރުގަދަކަމުންނެވެ. ދެ ކަނޑި ކޭތޭ އަޑު ހުއްޓުމެއް ނެތި ކަތޫމްއަށް އިވެމުންދެ
އެވެ. އެތެރެއަށް ވަނުމުގެ ހުއްދައަށް އެދެންފެށި އަޑާއެކު ކަތޫމް ސިހުނެވެ. އެއީ
ފިރިމީހަކަން ޔަޤީންވުމުން ހުއްދަ ދީފިއެވެ.
"މި
ތަނުން ނުނިކުންނާތި!!!" ފެން ކަންވާރުގައި ތުންޖަހާލަމުން ބަޖީލް ބުންޏެވެ.
"މިއަދު މިކަން ނިންމާނަން!!" ބަޖީލްގެ އަޒުމަކަށް ބަދަލެއްނާދެ އެވެ.
ބަޖީލް ދުނިޔެއަށް އުފަންވީވެސް ހަނގުރާމައިގެ ތެރެއަށެވެ. އޭނާގެ ބައްޕަ މަރާލީ
ދުޝްމިނުންނެވެ. އޭނާގެ ކުރިމަތީގަ އެވެ. ބަދަލު ހިފުމަށް ބަޖީލްވަނީ ނުހަނު
ބޭނުންވެފަ އެވެ. ދުޝްމަނުންގެ އަތްދަށަށް ރަސްކަންނުގޮސް، ބަޖީލްއަށް
ރަސްކަންލިބުނީ އޭނާގެ ހިތްވަރުންނެވެ. އެހެނަސް އަދިވެސް ދުޝްމަނުން
ދަހިވެތިވެފައިވަނީ ރަސްކަމަށެވެ. ހަނގުރާމަ ކުރެވެމުންދާ ސަބަބަކީ މިއީއެވެ.
"އަހަރެން
މި ދަނީ!!! ނަމަނަމަ މިތަނުން ބޭރަށް ނުނިކުންނާތި..." ބަޖީލް އޭނާގެ
އަންހެނުންނަށް ހަނދާންކޮށްދިނެވެ. އަދި އެއަށްފަހު ނިދާފައި އޮތް އޭނާގެ ދަރިފުޅު
ޖަބުހާގެ ކޮލުގައި ބޮސްދިނުމަށްފަހު ބޭރަށް ނުކުތެވެ. ދަރިފުޅަށް ސަމާލުވުމަށް
އަންހެނުންނަށް އެންގުމަށް ފަހުގަ އެވެ.މި މަންޒަރު ބަލަން ކަތޫމު ހުރީ ނުހަނު
ދެރަވެ ފެންކަޅިވެފަ އެވެ.
3 ގަޑިއިރު
ފަސް
ޖަބުޙާއަށް
ހޭލެވުމާއެކު ބައްޕައަށް ގޮވަންފެށި އެވެ. އެ އަޑު އިވުމާއެކު ކަތޫމް
ބަލައިލިއެވެ. އޭރު ޖަބުޙާ ބޭރަށް ނުކުންނަނީ އެވެ. ކަތޫމްވެސް އޭނާގެ ފަހަތުން
ދުއްވައިގަތެވެ. ކަތޫމްއަށް ނުކުމެވުނު އިރު ޖަބުޙާ ވަނީ ދުޝްމަނުންގެ
އަތްދަށުވެފަ އެވެ. ދަރިފުޅުގެ ސަލާމަތަށްއެދި އޭނާ އާދޭސްކުރަން ފެށި އެވެ. ހަމަ
އެއާއެކު ކަތޫމްވެސް ދުޝްމަނުންގެ އަތްދަށުގައި ހައްޔަރުވި އެވެ. ހޫނުވެފައިވާ
ހަނގުރާމައިގެ ތެރޭގައި އެ ދެމައިން އަޑުން އަޑުނަގައި ރޮމުންގެންދިޔަ އެވެ.
ހިތްވަރާއެކީ
ހަނގުރާމަކުރަމުން ދިޔަ ބަޖީލްގެ ސަމާލުކަން އަތުލައިގަތީ ދުޝްމަނުންގެ
ވެރިޔާއެވެ. ހައްޔަރުކުރެވިފައިވާ އޭނާގެ އާއިލާ ފެނުމުން ބަޖީލްގެ ލޮލުން ކަރުނަ
ހިލުނެވެ. މާޔޫސްވެ ހިތްދަތިވި އެވެ. ވާނީވެސް އެހެންތާ އެވެ. ދުނިޔޭގައި އޭނާ
ދިރިއުޅެމުން އެދަނީ އެ ދެމައިންނަށްޓަކަ އެވެ. އެ ދެމައިން ދެކެ ބަޖީލް ލޯބިވަނީ
އިންތިހާއަށެވެ.
ހަނގުރާމަ
ހުއްޓަލުމަށް ފަހު ބަޖީލް އަމިއްލައަށް އެމީހުންނާ ހަވާލުވުމަށް ދުޝްމަނުން
އަމުރުކުރި އެވެ. އެ ގޮތަށް ކަންތައް ނުކޮށްފި ނަމަ ކަތޫމް އާއި ޖަބުޙާގެ ބޯ އެ
ދެމައިންގެ ހަށިގަނޑާއި ވަކިކުރެވޭނެކަމުގެ އިންޒާރު ބަޖީލްއަށް ދިނުމާއި އެކު
އޭނާއަށް މަޖުބޫރުވި އެވެ. ބަޖީލްގެ ކަނޑި މަޑުމަޑުން ބިންމަތީގައި ބޭއްވިއެވެ. މި
މަންޒަރު ބަލަން ބަޖީލްގެ ފަހުލަވާނުން ތިބީ ހަމަހިމޭންކަމާ އެކުގަ އެވެ. ދެން
ފެނިގެން ދިޔައީ ހަތަރުފަސް ދުޝްމަނުން އައިސް ބަޖީލް ހައްޔަރުކުރި މަންޒަރެވެ.
ދުޝްމަނުންގެ
އަތްދަށުގައި ބަޖީލް ހައްޔަރުވުމަށްފަހު މާ ގިނައިރެއް ނުވި އެވެ. ބަޖީލްގެ
ކުރިމަތީގައި އޭނާގެ އަންހެނުންނާއި ދަރިފުޅު ޤަތުލްކޮށްލައިފި އެވެ. ރަހުމެއްނެތް
އަތަކުން ރަހުމު ކުޑަ ގޮތަކަށެވެ. ބަޖީލްގެ ލޮލުން ކަރުނަ އޮހެމުންދިޔަ އެވެ. އެ
ހިތާމައިގައި ވިލާތައްވެސް ކަރުނައަޅާ ރޮމުންގެންދާ ކަހަލަ އެވެ. ވެހެމުންދިޔަ
ވާރޭ ފެނުގެ ތެރެއަށް އެ ދެ މައިންގެ ލޭ ޣަރަޤްވަމުން ދިޔަ އެވެ.
ކުއްލިއަކަށް
ބަޖީލް ތެދުވި އެވެ. އޭނާ ހައްޔަރުވެފައިވާ ހިލިހިލާ ފުނޑާލުމަށްފަހު ބިންމަތީގައި އޮތް ކަނޑިނަގައި އަތަށް ހެޔޮވަރުކޮށްލި
އެވެ. އެއާއެކު ދުޝްމަނުންގެ ހޫނު ހަމަލާތައް އޭނާއަށް ރައްދުވި އެވެ.
އަނެއްކާވެސް ހަނގުރާމަ ފެށިއްޖެ އެވެ. ބަޖީލް ދިޔައީ އަތުޖެހުނު އެއްޗަކަށް
އޭނާގެ ކަނޑިގެ ތޫނުކަން ދައްކަމުންނެވެ. ބަޖީލަށް އާދަޔާ ޚިލާފު ބާރެއް
ލިބިފައިވާކަހަލަ އެވެ. ބަޖީލްއާއި ކުރިމަތިލީ ކޮންމެ އެއްޗެއްގެ ފުރާނަ އެ
އެއްޗެއްގެ ހަށިގަނޑާ ވަކިކޮށްލަ އެވެ.
ދުޝްމަނުންގެ
ލަޝްކަރު އެކީ އެކައްޗަކަށް މަރާ ހުސްކޮށްލުމަށްފަހު ބަޖީލް، އޭނާގެ
އަންހެނުންނައި ދަރިފުޅުގެ މުޅަ މަސްގަނޑު ކުރިމަތީ ކަކޫ މައްޗަށް ތިރިވި އެވެ.
އެއަށް ފަހު އެ ދެ މައިންގެ ބޮލާއި ހަށިގަނޑު ހިފައިގެން ތެދުވެ ވަރަ
ހުޅުވާލުމަށްފަހު މައްޗަށް އުދުއްސައިގަތެވެ.
28 ސެޕްޓެމްބަރ
1798
ބަޖީލްގެ
އަންހެނުންނާއި ދަރިފުޅު ވަޅުލާފައިވަނީ ކ ހުރާގައި، މީހުން
ވަޅުލުމަށް ޚާއްޞަކުރެވިފައިވާ ޤަބުރުސްތާންގަ އެވެ. ބަޖީލްގެ ޢަދާވާތްތެރިންނަށް
ވަންހަނާކުރުމުގެ ގޮތުންނެވެ. ކޮންމެ ރެއަކުވެސް ބަޖީލް މިތަނަށް ޒިޔާރަތްކުރެ
އެވެ. ނަމަވެސް މިއަދު އޭނާއަށް ކެތްނުކުރެވުނީ އެވެ. އިރުއޮއްސެން
ކައިރިވެފައިވަނިކޮށް އާދެވުނީ އެހެންވެ އެވެ. ބަޖީލް، އޭނާގެ އަންހެނުންނާއި
ދަރިފުޅުގެ ހަނދާންކުރަމުންދެ އެވެ. އާދައިގެ މަތިން އެ ހަނދާންތައް އައުކުރާ
ފަދައިންނެވެ. ބަޖީލްގެ އަންހެނުންނާއި ދަރިފުޅުގެ ކަށްބޯ ނަގައި އެއަށް
ވެލިފުރަނީ އެވެ. މަރުވެފައި ތިބޭ މީހުންގެ ޒިކުރާ އާކުރަމުންދާ ގޮތަކީ މިއީ އެވެ.
ބަނޑިޔާ،
ކިހިލި ޖަހައިލައިގެން ފަރި ހިނގުމެއްގައި އާމިނާބީ އައިސް ވަޅުދޮށާ ގާތްވެ
ފެންފުރަން ފެށި އެވެ. ގޭގައި ބޯނެ ފެންފޮދެއްނެތުމުން ރޭވުމުގެ ކުރިން
ފެންފޮދެއްބަލައި އައީ އެވެ. ފެންފުރަމުންދަނިކޮށް ފެނުނު މަންޒަރަކުން އަމިނާބީގެ
މޭގަނޑު އަނގައަށް އައިކަހަލައެވެ.ލިބުނު ސިހުމާ އެކު ބަނޑިޔާ ދޫކޮށްލެވުނެވެ.
ބަޖީލް
ސިހިފައި ބަލައިލި އެވެ. އަންހެނެއްގެ ހަޅޭކުގެ އަޑަށެވެ. އޭރު އާމިނާބީ ދުވެފައި
ދަނީ އެވެ. "ފޫޅުދިގު ހަންޑި"އޭ ގޮވަމުންނެވެ. ބަޖީލަށް ބަލައިލެވުނީ
އޭނާގެ ދިގު ފޫޅަށެވެ. އިޚްތިޔާރެއް ނެތި ބޭއިޚްތިޔާރުގަ އެވެ.
– ނިމުނީ-
ޚިޔާލު :
ޚިޔާލު ފާޅުކުރެއްވުމަށް
ހިޔާލު