ރީތިކަމަށް ލޯބިކުރި ހަމީދަށް އަހަރެން ހުތުރުވާންފެށިއެވެ. އަހަރެންދެކެ ލޯބިވި ހަމީދު އަހަރެންދެކެ ފޫހިވާކަމަށްވެސް ބުނަންފެށީ ފާޅުގައެވެ. އަހަރެންނާއެކު އުޅެން ބޭނުމެއްނޫނޭ ބުނަންފެށީ ހާމު އާއިމެދު އެެއްވެސް ވިސްނުމެއްނެތިއެވެ. އަހަރެން އާދޭސްކުރީމެވެ. އަހަރެން ދޫކޮއްނުދިއުމަށްބުނެއެވެ. ރުއީމެވެ. ގިސްލީމެވެ. އެކަމުންވީ ކަމެއްނެތެވެ. އެންމެފަހުން ހަމީދު އަހަރެން ވަރިކޮށް ދިޔައީއެވެ.
*********************************************
އޭރު ހާމުގެ އުމުރަކީ އެންމެ ފަސް އަހަރެވެ. އެދުވަހަށްފަހު ހާމު ފެނުނަސް އަހަރެން ފޫހިވާންފެށިއެވެ. އެ ކުށެއްނެތް ދަރިފުޅަށް ރުޅިބޭލެންފެށިއެވެ. އަހަރެންގެ ސިފަ ބަދަލުވީ ހާމު ވިހެއުން ކަމުގައިވުމުން އެކަމުގެ ތުހުމަތް ހާމުއަށް ކުރެވެނީއެވެ. އެ ދަރިފުޅު ރޯއަޑު އިވެއެވެ. އިވޭކަމަށް ނުހަދަމެވެ. ޝަކުވާކުރާ ކޮންމެ ފަހަރަކު އަހަރެން އަދަބުދެމެވެ. ގެއިން ބޭރު ކޮއްލަމެވެ. ގޭގައި އުޅެނީ އަހަރެމެން ދެމީހުން އެކަނިކަމުން އަހަރެންނަށް ބަހެއްބުނާނޭ މީހަކު ނޫޅެއެވެ. އަހަރެން މި އުޅޭ ރަށް މާލެއަކީ މާ ބިޒީ މީހުންއުޅޭތަނަކަށްވީތީ އެނެއްކެއްގެ ކަމެއް ބަލައިލާކަށްވެސް އެހެން މީހަކަށް ވަގުތެއްނުވެއެވެ. އެ ދަރިފުޅު ފޫހިވެ އެކަނިވެފައި އިންނަތަން އަހަރެންނަށް ފެނެއެވެ. އެކަމަކު އަހަރެން ފެންނަކަމަކަށް ނުހަދަމެވެ. އަތުގައި ހުރި ފައިސާ ހުސްވާންފެށުމުން އަހަރެން ވަޒީފާއަކަށް ދާންފެށީމެވެ. އޭރު ހާމުއަށްވެސް ހަތް އަހަރުވެ އޭނާވެސް ސުކޫލަށް ފޮނުވަންފެށީ އަހަރެންނަށް ލިބިދާނޭ ލަދަކުން ސަލާމަތްވުމަށެވެ. ހާމު ކިޔަވާތޯ ނުކިޔަވާތޯވެސް އަހަރެން ނުބަލަމެވެ. ބޭނުންވާ އެއްޗެއްވެސް ހޯދާ ދެވެނީ އެކުއްޖާ އެތަށްފަހަރަކު ބުނުމުންނެވެ.
އަހަރުތަށް ނިމެމުން ދުވަސްެތަކަށް ބަދަލުވަމުން ދިޔައީ ހީވެސްނުކުރާހާ އަވަހަށެވެ. އަހަރެން އަހަރެންގެ ދުނިޔޭގައި އުފަލުގައި އުޅެމުންދިޔައީމެވެ. ހާމު އެއްވެސް ކަމެއް އަހަރެން ނުބަލަމެވެ. ގޭގައި ނޫޅުނަސް ކޮބައިތޯވެސް ބަލައިނުލަމެވެ. އެކަމުގެ ސަބަބުން އަހަރެންނަށް ފުންކަނޑެއްގައި ގެބެންޖެހިދާނޭ ކަމަކަށް އަހަރެން ފިކުރެއްނުކުރަމެވެ. އަހަރެންގެ މުޅި ދިރިއުޅުން ބަދަލުވެގެންދިޔައީ އެދުވަހުއެވެ. ވަރަ ކެނޑި ހަމަބިމަށް ވެއްޓުނީ އެކޯލް އައި ހިސާބުންނެވެ. ގުޅީ ނުދަންނަ ނަންބަރަކުންނެވެ. ވީހާވެސް އަވަހަކަށް ހޮސްޕިޓަލަށް އައިސްދޭން އެދުނެވެ. އަހަރެންގެ ހިތްނުބައި ގޮތަކަށް ތެލިގަތެވެ..ލިބެންއުޅޭ ހަބަރު ހަވަނަ ހިއްސު ދެނެގަތީކަންނޭގެއެވެ. އަވަސް އަވަސް ކޮއްލައިގެން ހޮސްޕިޓަލަށް ދިޔާމެވެ. ދޮރުން ވަދެވުމާއެކު އަހަރެންނަށް ލިބުނީ ކުއްލިސިހުމެކެވެ. މުޅި ހޮސްޕިޓަރ ތެރެވަނީ މީހުންފުރި ބާރުވެފައެވެ. މީޑިޔާތަކާއި ޕޮލިހުންވެސް ހަރަކާތްތެރި ވަމުންދިޔައެވެ. ކޮންމެ މީހެއްގެވެސް މޫނުމަތިން ފެންނަމުން ދިޔައީ ސިހުމެވެ. ހިތާމައެވެ. ބައެއްމީހުން ރަޮމުންވެސް ދިޔައެވެ. އަހަރެންނަށް ހުރެވުނީއެވެ. ވާނުވާ ނޭނގިފައެވެ.
އަހަރެން މިތަނަށް މިގެނުވީ މީހަކަށް އޮޅިގެންބާވައޭ ހިތަށްއެރިއެވެ. އެވަގުތު އަހަރެން ފެނިގެން ޕޮލިހަކު އަހަރެން ކައިރިއަށް އައިސް އޭނާޔާއެކު އައުމަށްބުންޏެވެ. އެތަށްއެޗެއް އަހަރެންގެ ހިތަށް އަރަމުންދުޔައެވެ. އެމީހާ ގޮސް ހުއްޓުނީ ކޮޓަރިއެެއްގެ ކުރިމަތީގައެވެ. އެހިސާބުގައި އެއްވެސް މީހެއްފެންނާކަށްނެތެވެ. ފާޑަކަށް އަހަރެން ޖެހިލުންވާންފެށިއެވެ. ވާންމިއުޅެނީ ކިހިނެއްބާވައެވެ. އެމީހާ އަހަރެންގާތު އެތެރެއަށް ވަންނަންބުނުމުން ދޮރުހޮޅުވައިލާ އެތެރެއަށްވަނީމެވެ.. ފެނުނު މަންޒަރުން އަހަރެން ވަގުތުކޮޅަކަށް ހުއްޓުންއެރުއެވެ. ހީވީ ފައިދަށުން ބިންގަނޑު ދެމިގަތްހެންނެވެ. ހިތްކުދިކުދިވި ކަމުގެ އިހްސާސްކުރެވުނެވެ. ކަރުނަތަށް އޮހިގަތީ އަމިއްލަ އިހްތިޔާރުންބޭރުގައެވެ. ހިންދިރުވާލެވުނީ ހިތަށްލިބުނު ވޭނެއްގެ ސަބަބުންނެވެ.
އެހެންނުވަންވީ އެއްވެސް ސަބަބެއްނެތެވެ. ކިތަންމެ ރުޅިއާދެވުނުކަމުގައިވިޔަސް ފެންނަން އެޔޮތީ އަހަރެންގެ ލެޔެވެ. އަހަރެންގެ ދަރިފުޅެވެ. އެ ހަށިގަނޑުގައި ފެންނަންހުރީ ޒަހަމްތަކެވެ. އެކިވަރުގެ އަނިޔާތަކެވެ. ލޯވެސް ބޭރަށްނުކުމެފައިވާ އިރު އެއްއަތްވަނީ އެނބުރިފައެވެ. މޫނުގެ ކޮންމެތަންކޮޅެއްގައިވަނީ ވަކީގެ ނިޝާންތަކެވެ. އެ ދޮން ހަށިގަނޑުވަނީ ރަތްވެފައެވެ. އަހަރެންނަށް ދުއްވައިގަނެވުނީ ހާމް އޮތް އެނދާދިމާއަށެވެ. "ދަރިފުޅާ" އަހަރެންނަށް ހަޅޭލަވައިގަނެވުނެވެ. އެވަގުތު ޕޮލިސްމީހާ އައިސް ހާމް ގައިގައި އަތްނުލުމަށް ބުންޏެވެ. "ކާކު؟ ކީއްވެ؟." އަހަރެންނަށް ބުނެވުނީ އެވަރަށެވެ. ބާރުބާރަށް ރޯންފެށުނެވެ. މީހާ ތުރުތުރުއަޅަންފެށިއެވެ. ޕޮލިސްމީހާ ކިޔައިދޭންފެށި ވާހަކަތަކުން އަހަރެންގެ ހިތުގައި ހިވީ މީހަކު ވަޅިއަޅަމުންދިޔަހެންނެވެ. "ހާމް ވާނީ މަސްތުވާތަކެތީގެ ޝިކާރައަކަށްވެފަ. މިހާތަނަށް ހޯދި ހޯދުމަށް ބެލެވޭގޮތުގައި ހާމް މަރާލާފައިވަނީވެސް މަސްތުވާތަކެތީގެ މައްސަލައެއްގައި ހިނގި މާރާމާރީއެއްގަ. ހާމް ސުކޫލަށް ނުދާތާވެސް އަހަރެއްވެފައިވާން ކައިރިވެފައިވާ ކަމަށްވެސް ފާހަގަކުރެވުނި. އަދި ހާމްއަށް ވަނީ ޖިންސީ ގޮތުންވެސް އެތަށް އަނިޔާތަކެއްކޮއްފަ." އަހަރެންނަށް ބަހެއްނުބުނެވުނެވެ. ހަމަ ރޮވެނީއެވެ. އެދުވަހަށްފަހު މިއަދާހަމައަށްވެސް އަހަރެންގެ ހާލަކީމިއީއެވެ. ހާމްެއަށް އަޅާލުމާއި ލޯބި ދެވުނުނަމައޭ ހިތަށް އަރަނީއެވެ. އެދަރިފުޅު މަރުވެގެންދިޔަ ވަގުތު ރޯނޭވަރު ސިފަވަނީއެވެ. ކުއްވެރިޔަކީ އަހަރެން ނޫންހެއްޔެވެ. މިއަދު އަހަރެން ރޯންވީ ކީއްވެހެއްޔެވެ؟ ދުނިޔޭގައި ހުއްޓައި އެދަރިފުޅަށް އަޅައެއްނުލެވުނެވެ. އަރެންވީވެސް އިހްމާލެވެ. އަހަރެންބެލި ނަމަ 13 އަހަރުގައި އެގޮތަަށް މަރުވެގެން ނުދިޔައީހެވެ. އެއީ އަހަރެންނަށް ހަވާލުކުރެވުނު އަމާނާތެކެވެ. އަހަރެންވީ ހިޔާނާތެވެ. އެކަމަކު މިއަދު އަހަރެންނަށް ހެޔަޮވިސްނުން ލިބިއްޖެއެވެ. ނަމަވެސް މާފަހުންނެވެ.
- ނިމުނީ -
×××
ردحذف