މާފަހުން މުޅިގޭތެރެއަށް ވެރިވެފައި ވަނީ ފަޅުކަމެވެ. އެކަނިވެރިކަމެވެ. ޖެހިބުދެއްހެން އަަހަރެންނަށް އިނދެވެނީ ވިސްނާށެވެ. ހިޔާލުތަކުގައެވެ. ފިކުރުކުރުމުގައެވެ. ރުއިމުގައެވެ. ގިސްލުމުގައެވެ. ދެ އަހަރުވެގެން ދިޔައިރު އިއްޔެވީ ކަމެއްހެން އެކަންތަށް ލޮލުކުރިމަތީ ސިފަވަމުންދަނީއެވެ. ކުއްވެރިޔަކީ އަހަރެން ކަމުގައި ހިތަށް އެރުމާއެކު ބާރަށް ރޯންފެށެއެވެ. ބަޑިފަޅާގެންދެއެވެ. އަހަރެންނަށް ފަރުވާކުޑަކުރެވުނީއެވެ. ނޫނެކެވެ. ފަރުވާކުޑަކުރީ އަމިއްލައަށެވެ. އަޅާނުލީ ގަސްދުގައެވެ. އެކަރުނަތަށް ފެނުނަސް ނުފެންނަކަމަށް ހެދީއެވެ. އެ ރުއިމަށް ބީރުކަންފަތެއް ދިނީއެވެ. އަހަރެންގެ އަޅާލުމައި ލޯތްބާއި އޯގާތެރިކަން ބޭނުންވާނޭކަން އެނގިހުރެ ނޭނގޭކަމަށް ހެދީއެވެ. ނުބައި މަގުން ހިނގަން މަގުކޮށައި ދިނީ އަހަރެންނެވެ. އަހަރެންމީ ހާދަހާވާ ގޯސްމީހެކެވެ. ނުކުރާ ކުށެއްގެ ސަޒާ ދެވުނީ އަމިއްލަ ލެޔަށެވެ. ބަނޑުއަޅާވިހޭ ދަރިއަށެވެ. "މަންމަ" ގެ އެ ނަމަށްވެސް ހަޑިކުރެވިޖެއެވެ. އެއީ މީގެ ދެއަހަރުކުރިއެވެ. އަހަރެންނާއި ހަމީދު ދިމާވީ ފިހާރައަކުންނެވެ. ހަމީދު މަސައްކަތްކުރަނީ އެ ފިހާރާގައެވެ.
މަދުމަދުން ވާހަކަދެކެވި އަހަރެމެންގެ ގުޅުން ލޯތްބަށް ބަދަލުވެގެން ދިޔައީ ހީވެސްނުކުރާހާ އަވަހަށެވެ. ކައިވެނީގެ ގޮށްޖަހާލީ ދެފަރާތުގެ އާއިލާގެ ފުރިހަމަ ރުހުމާއެކުއެވެ. ވަކިނުވާނޭކަމުގެ ވައުދާ ހުވާ ކުރަމުން، އަހަރެމެން އުޅެމުން ދިޔައީ ވަރަށް އުފަލުގައެވެ. އެހާމެ ލޯތްބާއެކުއެވެ. ހިތާމައަކީ ކޮންއެއްޗެއް ކަމެއްވެސް އަހަރެންނަށް އެއިރު ނޭނގެއެވެ. އަހަރެންގެ މި އުފާވެރިކަން ދެގުނައަށް އިތުރުވެގެން ދިޔައީ އަހަރެން ބަލިވެއިން ކަމުގެ ހަބަރުލިބުމުންނެވެ. ހަމީދުގެ ފަރާތުން އަހަރެންނަށް އަޅާލުމާއި އޯގާތެރިކަން ލިބެމުންދިޔައެވެ. ދަރިފުޅުފެނުމާއެކު އުފަލުން އަހަރެންނަށް ރޮވުނެވެ. އަހަރެމެނަށް ލިބުނީ ލޯބި ލޯބި ފިރިހެންދަރިއެކެވެ. ހާމް ހަމީދު ގެ ނަމުން ދަރިފުޅަށް ނަންކީ ހަމީދުއެވެ. އެއީ ހަމީދުއަށް މާރީތި ނަމަކަށްވީމައެވެ. ވިހާގަދަވިއިރު އަހަރެންގެ ހަށިގަނޑަށްވަނީ ވަރަށް ބޮޑެތި ބަދަލުތަށް އައިސްފައެވެ. ލޫޅާފަތި ހަށިގަނޑުވަނީ ފަލަވެފައެވެ. މޫނުގެ އޮމާން ހަންގަނޑު ވަނީ ބިހީގެ ލަކުނުތަށްލާފައެވެ. އެކަން އަހަރެންނަށް ބޮޑުކަމަކަށް ނުވިއަސް އެކަން ބޮޑުވީ ހަމީދަށެވެ. އޭނާއަށް ރީތިމީހަކު ފެނުނީއެވެ.
ރީތިކަމަށް ލޯބިކުރި ހަމީދަށް އަހަރެން ހުތުރުވާންފެށިއެވެ. އަހަރެންދެކެ ލޯބިވި ހަމީދު އަހަރެންދެކެ ފޫހިވާކަމަށްވެސް ބުނަންފެށީ ފާޅުގައެވެ. އަހަރެންނާއެކު އުޅެން ބޭނުމެއްނޫނޭ ބުނަންފެށީ ހާމު އާއިމެދު އެެއްވެސް ވިސްނުމެއްނެތިއެވެ. އަހަރެން އާދެސްކުރީމެވެ. އަހަރެން ދޫކޮއްނުދިއުމަށްބުނެއެވެ. ރުއީމެވެ. ގިސްލީމެވެ. އެކަމުންވީ ކަމެއްނެތެވެ. އެންމެފަހުން ހަމީދު އަހަރެން ވަރިކޮށް ދިޔައީއެވެ.
- ނުނިމޭ -
ޚިޔާލު :
ޚިޔާލު ފާޅުކުރެއްވުމަށް
ހިޔާލު